30 студзеня адбылася цырымонія ўзнагароджання лаўрэатаў і пераможцаў конкурсу эсэ і навуковых працаў па тэме "Даступнасць і інваліднасць. Канвенцыя аб правах інвалідаў", які праводзіў Офіс па правах людзей з інваліднасцю. Першае месца заняла праца Настассі Янучак. Настасся - студэнтка 5 курса факультэта права Беларускага дзяржаўнага эканамічнага ўніверсітэта. Праца Настассі прысвечана Канвенцыі аб правах інвалідаў (ААН).

Другое і трэцяе месцы атрымалі Яўген Шаўко і Юлія Катаржынская.

27 студзеня Офіс па правах людзей з інваліднасцю прыняў удзел ва ўстаноўчым круглым стале "Партнёрства без абмежаванняў", які арганізавала прадстаўніцтва Міжнароднага дзіцячага фонду.

Асноўная мэта мерапрыемства - павышэнне патэнцыялу і выніковасці арганізацыяў, якія працуюць для людзей з інваліднасцю, праз прыцягненне зацікаўленых бакоў і развіццё партнёрства.

26 студзеня 2012 года ў Акадэміі кіравання пры Прэзідэнце Рэспублікі Беларусь прайшла навукова-практычная канферэнцыя «Безбар’ернае асяроддзе як фактар ​​ўстойлівага развіцця грамадства». Праграма канферэнцыі складалася з семінараў, кожны з якіх закранаў вострую сацыяльную праблему ў галіне інваліднасці. Выступоўцы раскрылі праблемы, якія сустракаюцца на кожным этапе жыцця чалавека з інваліднасцю. Ад стварэння ўмоваў пры выхаванні дзіцяці, яго навучання і адаптацыі ў грамадстве да вырашэння праблемы з працаўладкаваннем і занятасцю.

У перыяд з 31 студзеня да 21 лютага 2012 года Офіс па правах людзей з інваліднасцю праводзіць рэгіянальны этап інфармацыйнай кампаніі «Даступнасць». Інфармацыйныя дні пройдуць у абласных цэнтрах краіны па наступным плане:

31/01 - Гродна (Адрас: вуліца Будзёнага, 48а, офіс 62).

01/02 - Брэст (Адрас: кафэ "Фея" вул. Пушкінская 16/1).

08/02 - Віцебск (Адрас: пр-т Фрунзэ, д.92 к.2 Віцебскі дом-інтэрнат пажылых людзей і інвалідаў (Актавая зала).

15/02 - Магілёў (Адрас: вул. Сурганава, 21).

16/02 - Гомель (Адрас: вул. Пралетарская, 18).

23 студзеня Віцебская аб’яднаная арганізацыя грамадскага аб’яднання “Рэспубліканская асацыяцыя інвалідаў-калясачнікаў” (РАІК) пры падтрымцы Офіса па правах людзей з інваліднасцю прыступае да рэалізацыі праекту “Праца пераадольвае бар’еры”. Галоўная мэта праекта - правядзенне даследавання занятасці і даступнасці працаўладкавання для людзей з інваліднасцю ў Віцебску і вылічэнне найбольш слабых месцаў у гэтай сферы. Усе сабраныя звесткі будуць прааналізаваныя і супастаўленыя паміж сабой. Па выніках праекта плануецца правесці круглы стол і прэзентацыю вынікаў даследавання.

ПРАВІЛЫ ПРАВЯДЗЕННЯ КОНКУРСУ

“Пераклад Канвенцыі аб правах інвалідаў на беларускую мову”

Асветніцкая праваабарончая ўстанова “Офіс па правах людзей з інваліднасцю” абвяшчае конкурс “Пераклад Канвенцыі аб правах інвалідаў на беларускую мову”. Дзейнасць Офіса па правах людзей з інваліднасцю скіраваная на прасоўванне панятку інваліднасці як праблемы правоў чалавека. У сваёй дзейнасці мы абапіраемся на каштоўнасці і палажэнні Канвенцыі аб правах інвалідаў (далей Канвенцыі).

Дарагія сябры!

Ад усёй душы віншуем Вас з надыходзячымі святамі - Раством Хрыстовым і Новым годам!